Бо мақсади баланд бардоштани маърифати тиббӣ ва пешгирии заҳролудшавӣ аз маҳсулоти ғизоии нодуруст нигоҳдошташуда, дар шаҳр мулоқот бо иштироки муовини Раиси шаҳр Раҳмонзода Гулчеҳра ва муовини директори Маркази назорати давлатии санитарию эпидемиологии вилояти Суғд Орипов Маҷнун бо фаъолон ва сокинони шаҳр баргузор гардид.

Зимни вохӯрӣ таъкид карда шуд, ки заҳролудшавӣ аз консерваҳои худсози хонагӣ метавонад боиси бемории вазнини ҳасибак (ботулизм) гардад. Қайд гардид, ки ангезандаи ин беморӣ бактерияи Clostridium botulinum буда, дар муҳити бе ҳаво афзоиш ёфта, заҳри ниҳоят пурқувват ҳосил менамояд. Ин заҳр ба системаи асаб таъсир расонида, метавонад боиси фалаҷ ва ҳатто марг гардад.

Муовини директори МНДСЭ вилояти Суғд Орипов Маҷнун дар суханронии худ оид ба роҳҳои пешгирии беморӣ маълумоти муфассал пешниҳод намуда, аз сокинон даъват ба амал овард, ки ҳангоми омода ва нигоҳ доштани маҳсулоти консервшуда қоидаҳои санитарию гигиениро қатъиян риоя намоянд.

Дар рафти мулоқот ба шаҳрвандон тавсия дода шуд, ки консерваҳоро бо риояи талаботи стерилизатсия омода намоянд, аз истифодаи бонкаҳои варамкарда ва сарпӯши болоомада худдорӣ кунанд, маҳсулоти шубҳанокро истеъмол накунанд ва пеш аз истифода консерваҳои хонагиро ҳатман ҷӯшонанд.

Таъкид гардид, ки пешгирии беморӣ аз эҳтиёткорӣ ва масъулияти ҳар як шаҳрванд вобаста буда, риояи оддитарин қоидаҳои бехатарӣ метавонад ҷони инсонҳоро аз хатари ҷиддӣ эмин нигоҳ дорад.