Бахшида ба соли 2017 - Соли ҷавонон як гуруҳ ҷавонони ватандӯсту худогоҳи шаҳрамон иқдом пеш гирифта, азм намуданд, ки дар арафа ва рӯзҳои таҷлили ҷашни Наврӯз дар ободонии диёр саҳм гузоранд. Бо ин мақсад дар масҷиди «Мазори Сурх» зиёда аз 60 нафар ҷавонон ҷамъ омада, ҳудуди масҷидро тозаву обод гардониданд. Бо меҳнати дастаҷамъонаи ҷавонон партовҳо ба ҷойҳои муайян бароварда шуда, дарахтон сафед ва ҷӯйборҳо тоза карда шуданд.

Ҷавонони шаҳр ният доранд, ки чунин иқдомҳоро афзун намуда, дар ободонии диёр саҳмгузор гарданд. Бахусус, дар Соли ҷавонон пайваста баргузор намудани шанбегиҳоро ба нақша гирифта, дар радифи он фаъоливу масъулиятшиносӣ ва худогоҳии миллиро таҳким бахшиданианд.