Наврӯз миёни маросиму оинҳои қадими ниёгон бешак аз муқаддастарину пойдортарин ҷашнҳост. Бо вуҷуди таъсири тағйироту таҳаввулоти ҳаёти иҷтимоӣ-маишӣ вa фарҳангӣ-маънавӣ дар сарзаминамон ҳазорсолаҳо асосу бунёди он пойдору барҷо мондааст. Махсусан, дар арафа ва рӯзҳои таҷлили ин ҷашни миллӣ ба ҷо овардани амалҳои неку савоб ба ҳукми анъана даромадааст. Аз ҷумла, дар ин рӯзҳои накӯ дар коргоҳи «Таъмири қатораҳои Маҳрам» воқеъ дар Ҷамоати деҳоти ба номи Эргаш Шарипов чорабинии наврӯзӣ ва хатнасури як гуруҳ тифлакон аз оилаҳои ниёзманд доир карда шуд. Дар чорабинӣ раиси шаҳр Ғайбулло Боҳирӣ иштирок ва суханронӣ намуда, ҳамагонро табрик гуфта, нишоту сарсабзӣ ва хушнудиҳо орзу кард. Ба кӯдакони хатнасурдошта туҳфаҳои хотиравӣ тақдим гардид.

Дар ҷараёни чорабинӣ аз тарафи хонандагони муассисаҳои таълимии ҳудуди ҷамоат дар васфи баҳору Наврӯз шеъру тарона ва лавҳаҳо қироат карда шуд. Рақсҳои мавзун ва бадеҳаҳо низ иҷро карда шуда, хотири иштирокдорон болида гардонида шуд.

Санъаткорони бахши фарҳанги шаҳр бо суруду таронаҳои марғуб ба чорабинӣ ҳусни хоса зам намуданд.