Бо мақсади ҳифзи саломатии кӯдакон ва баланд бардоштани маърифати тиббии кормандони муассисаҳои томактабӣ, кормандони муассисаҳои кӯмаки аввалияи тиббию санитарии шаҳри Конибодом дар ҳамкорӣ бо мутахассисони Маркази ташаккули тарзи ҳаёти солим дар муассисаҳои томактабӣ корҳои фаҳмондадиҳӣ баргузор намуда истодаанд.

Дар ҷараёни вохӯриҳо ба мураббиён, кормандон ва волидон оид ба риояи қоидаҳои беҳдоштӣ, шустани дурусти дастҳо, ғизои солим, пешгирии бемориҳои сироятӣ, аҳамияти эмгузаронӣ ва ташаккули тарзи ҳаёти солим тавсияҳои муфид ва маълумоти зарурӣ пешниҳод гардид.

Зикр карда шуд, ки фароҳам овардани муҳити тозаву озода дар муассисаҳои томактабӣ, риояи қоидаҳои санитарӣ ва сари вақт муроҷиат намудан ба муассисаҳои тиббӣ ҳангоми пайдо шудани нишонаҳои беморӣ аз омилҳои муҳими ҳифзи саломатии кӯдакон ба ҳисоб меравад.

Чунин чорабиниҳои маърифатӣ ба баланд бардоштани сатҳи огоҳии кормандон ва волидон, пешгирии бемориҳо ва тарбияи насли солиму солеҳ мусоидат менамоянд.