Имрӯз дар шаҳри Конибодом дар доираи сафари иттилоотӣ корвони журналистони вилояти Суғд меҳмони шаҳр гардид. Меҳмононро Раиси шаҳри Конибодом Даврон Зоҳидзода дар хоҷагии деҳқонии «Зарбдор» истиқбол гирифта, бо дастовардҳои соҳаи кишоварзӣ ва корҳои созандагию ободонӣ шинос намуд.

Зимни вохӯрӣ ба рӯзноманигорон оид ба рушди иҷтимоию иқтисодии шаҳр, омодагиҳо ба ҷашни 35-солагии Истиқлоли давлатии Ҷумҳурии Тоҷикистон ва татбиқи лоиҳаҳои муҳими инфрасохторӣ маълумоти муфассал пешниҳод гардид.

Сипас ҳайати меҳмонон аз як қатор иншооти ҷашнӣ, истеҳсолӣ, иҷтимоӣ ва фарҳангии шаҳр боздид намуда, бо корҳои бунёдкорона, фаъолияти корхонаҳо ва пешрафти соҳаҳои гуногуни хоҷагии халқи Конибодом аз наздик шинос шуданд.

Журналистон ба корҳои ободониву созандагӣ, рушди соҳаҳои иқтисодиву иҷтимоӣ ва омодагии ҳамаҷонибаи шаҳри Конибодом ба истиқболи ҷашни миллӣ баҳои баланд дода, чунин сафарҳоро барои инъикоси воқеии дастовардҳои шаҳру навоҳӣ муҳим арзёбӣ намуданд.