Санаи 24 июни соли 2026 дар толори Мақомоти иҷроияи ҳокимияти давлатии шаҳри Конибодом таҳти роҳбарии Раиси шаҳр, Раиси Ситоди мудофиаи граждании шаҳр Даврон Зоҳидзода ҷаласаи корӣ оид ба омодагӣ ва баргузории Машқҳои мукаммали мудофиаи гражданӣ баргузор гардид.

Чорабинии мазкур тибқи Фармоиши Раиси Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон аз 2 июни соли 2026 таҳти №161, Фармони сардори Раёсати Кумитаи ҳолатҳои фавқулода ва мудофиаи граждании вилояти Суғд ва Қарори Раиси шаҳри Конибодом аз 18 июни соли 2026 таҳти №304 ба нақша гирифта шудааст.

Дар ҷаласа муовини якуми Раиси шаҳр, роҳбарону намояндагони хадамотҳои марбута, ташкилоту муассисаҳо, раисони ҷамоатҳои деҳот, инчунин намояндагони Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон ва сохторҳои вилоятии он иштирок намуданд.

Зимни ҷаласа масъалаҳои вобаста ба тартиби баргузории машқҳо, вазифаву уҳдадориҳои хадамоти дахлдор, ҳамоҳангсозии фаъолияти сохторҳои масъул ва дигар тадбирҳои омодагӣ мавриди баррасӣ қарор гирифтанд.

Таъкид гардид, ки Машқҳои мукаммали мудофиаи гражданӣ дар ҳудуди шаҳри Конибодом рӯзҳои 24–26 июни соли ҷорӣ баргузор гардида, ҳадафи асосии он санҷиши сатҳи омодабошии қувва ва воситаҳои хадамоти дахлдор, такмили малакаҳои амалии масъулин ва расонидани ёрии методӣ ҷиҳати ташкили самараноки чорабиниҳои мудофиаи гражданӣ мебошад.

Дар фарҷоми ҷаласа Раиси шаҳр Даврон Зоҳидзода ҷиҳати дар сатҳи баланд ташкил ва баргузор намудани машқҳои мазкур, таъмини омодабошии ҳамаҷонибаи сохторҳои масъул ва иҷрои саривақтии чорабиниҳои пешбинишуда ба масъулин дастуру супоришҳои мушаххас дод.