Тибқи нақшаи чорабиниҳои Шӯрои вилоятии Ҳаракати ҷамъиятии ваҳдати миллӣ ва эҳёи Тоҷикистон, санаи 23 июни соли ҷорӣ бахшида ба истиқболи 29-умин солгарди Рӯзи Ваҳдати миллӣ ва 35-солагии Истиқлоли давлатии Ҷумҳурии Тоҷикистон дар Коллеҷи омӯзгории ба номи Мирзо Турсунзодаи шаҳри Конибодом конференсияи илмӣ-амалӣ таҳти унвони «Нақши Пешвои миллат дар таҳкими Истиқлоли давлатӣ ва Ваҳдати миллӣ» баргузор гардид.

Дар кори конференсия намояндаи Шӯрои вилоятии Ҳаракати ҷамъиятии ваҳдати миллӣ ва эҳёи Тоҷикистон Набизода Ваҳҳоб Машраф, доктори илмҳои таърих, профессори Донишгоҳи давлатии Хуҷанд ба номи академик Бобоҷон Ғафуров, Фахриддинзода Фирдавс – муовини сардори Раёсати кор бо ҷавонон ва варзиши вилояти Суғд, Баҳодур Маҳмудов – мудири бахши бойгонии Мақомоти иҷроияи ҳокимияти давлатии шаҳри Конибодом, Ашурматзода Замира – муовини озоди Шӯрои шаҳрии Ҳаракати ҷамъиятии ваҳдати миллӣ ва эҳёи Тоҷикистон ва Марҳабо Расулова – директори Коллеҷи омӯзгории шаҳр иштирок ва суханронӣ намуданд.

Зимни баромадҳо иштирокчиён оид ба дастовардҳои таърихии Ваҳдати миллӣ, нақши сарнавиштсози Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар таҳкими Истиқлоли давлатӣ, барқарорсозии сулҳу субот, таъмини ваҳдати миллӣ ва рушди устувори кишвар андешаронӣ намуданд.

Таъкид гардид, ки маҳз бо талошҳои шабонарӯзӣ ва сиёсати хирадмандонаи Пешвои миллат Тоҷикистон аз вартаи низоъ раҳо ёфта, имрӯз ба кишвари сулҳу субот, созандагӣ ва пешрафт табдил ёфтааст.

Дар қисмати фарҳангии чорабинӣ аз ҷониби донишҷӯёни коллеҷ барномаи ҷолиби адабиву фарҳангӣ пешкаш гардида, суруду таронаҳо ва саҳнаҳои тарбиявӣ дар васфи Ватан, Истиқлолият ва Ваҳдати миллӣ пешниҳоди ҳозирин гардонида шуд.