Дар мавзеи Тӯқайи ҷамоати деҳоти Пӯлодон корҳои муҳими ба гардиши кишоварзӣ ворид намудани заминҳои бекорхобида ва заминҳои фонди махсус бо суръати баланд идома доранд.

Ин иқдом дар доираи татбиқи дастуру супоришҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон амалӣ гардида, ба рушди соҳаи кишоварзӣ ва таъмини амнияти озуқаворӣ равона шудааст.

Имрӯз бо мақсади шиносоӣ аз ҷараёни корҳои саҳроӣ Раиси шаҳри Конибодом Даврон Зоҳидзода аз ин мавзеъ боздид ба амал овард. Зимни боздид таъкид гардид, ки истифодаи самараноки ҳар як ваҷаб замин, бахусус заминҳои бекорхобида, яке аз вазифаҳои аввалиндараҷаи масъулин ба ҳисоб меравад.

Тибқи дастуру роҳнамоиҳои Раиси вилояти Суғд муҳтарам Раҷаб Аҳмадзода дар ин мавзеъ заминҳо тадриҷан ба гардиши кишоварзӣ ворид гардида, барои кишти зироатҳои гуногун, аз ҷумла пахта, омода карда мешаванд. Ин раванд ба баланд бардоштани ҳосилнокӣ ва афзоиши истеҳсоли маҳсулоти ватанӣ мусоидат хоҳад кард.

Масъулин уҳдадор гардиданд, ки бо истифода аз таҷрибаҳои пешрафта ва ҷалби техникаву технологияҳои муосир, корҳои кишоварзиро босифат ба роҳ монда, заминҳоро самаранок истифода баранд.