Мулоқоти навбатӣ дар доираи вохӯриҳо бо усули «Мактаб ба мактаб» дар Муассисаи таҳсилоти миёнаи умумии №41-и деҳаи Ҷаҳонзеби ҷамоати деҳоти ба номи А. Лоҳутӣ таҳти роҳбарии муовини Раиси шаҳр Раҳмонзода Гулчеҳра Раҳмон бо иштироки мудири шуъбаи маорифи шаҳр Абдувоҳидзода Фирӯза баргузор гардид.

Дар мулоқот бо падару модарон, омӯзгорон ва хонандагон масъалаҳои муҳими вобаста ба раванди таълиму тарбия, худшиносии миллӣ, эҳтиром ба забони давлатӣ, арҷгузорӣ ба анъанаҳои миллӣ, садоқат ба давлату миллат ва омодагӣ ба ҳифзи амнияти миллӣ мавриди баррасӣ қарор гирифтанд.

Муовини Раиси шаҳр Раҳмонзода Гулчеҳра Раҳмон ба аҳли маҷлис вазъи имрӯзаи ҷаҳонро ёдовар шуда, бедории сиёсӣ, саҳмгузорӣ дар таъмини сафи Қувваҳои Мусаллаҳ бо сарбозони ватандӯст ва дурӣ ҷустан аз бегонапарастиро аз шартҳои муҳими пойдории сулҳу субот арзёбӣ намуд.

Ҳамзамон, мудири шуъбаи маорифи шаҳр Абдувоҳидзода Фируза вобаста ба баланд бардоштани сатҳи сифати таълиму тарбия, иштироки хонандагон дар озмуну олимпиадаҳои сатҳи ҷумҳуриявию байналмилалӣ, робитаи мустаҳкам волидону омузгорон ва пешгирии даст ба ҷиноят задани хонандагон андешаҳои судманд баён дошт.

Таъкид гардид, ки насли ҷавон бояд асли худро бишиносад, замини меҳанро муқаддас шуморад ва ба арзишҳои миллӣ содиқ бошад.

Зеро маҳз фарзандони бошарафу ватандӯст метавонанд дар ҳифзи Ватан устувор бошанд ва нагузоранд, ки касе ба истиқлолу оромии он халал ворид намояд.