Санаи 27 феврали соли ҷорӣ дар мақомоти иҷроияи ҳокимияти давлатии шаҳри Конибодом таҳти роҳбарии Раиси шаҳр Даврон Зоҳидзода ҷаласаи васеи навбатии Комиссияи ҳудудӣ оид ба муқовимат ба савдои одамон баргузор гардид.

Дар ҷаласа ҳайати комиссия, мудирони шуъбаву бахшҳои мақомоти иҷроияи ҳокимияти давлатӣ, раисони ҷамоатҳои деҳот, роҳбарони ташкилоту муассисаҳо, кумитаҳои маҳаллӣ, аҳли ҷамоатчигӣ ва дигар шахсони дахлдор иштирок намуданд.

Раиси шаҳр Даврон Зоҳидзода ҷаласаро ифтитоҳ намуда, оид ба муҳиммият ва зарурияти баргузории чунин нишастҳо, инчунин тадбирҳои андешидашуда аз ҷониби давлат ва Ҳукумати ҷумҳурӣ дар самти муқовимат ба савдои одамон ва дигар ҷиноятҳои вобаста ибрози андеша кард. Мавсуф ҳадаф ва мақсадҳои ҷаласаи мазкурро шарҳ дода, ба тақвияти ҳамоҳангсозии фаъолият дар ин самт таъкид намуд.

Сипас, муовини якуми Раиси шаҳр Шокирӣ Ш. оид ба фаъолияти Комиссияи ҳудудӣ гузориши муфассал пешниҳод кард.

Ҳамчунин, муовини сардори шуъбаи ВКД Ҷумҳурии Тоҷикистон дар шаҳри Конибодом, полковники милитсия Бобозода Ҳ., устоди ДДҲБСТ, номзади илмҳои ҳуқуқшиносӣ, дотсент Солиев И.М., сархатиби шаҳр Аброров А., мудири шуъбаи кор бо занон ва оила Орифӣ М. ва мудири шуъбаи маорифи шаҳр Абдувоҳидзода Ф. вобаста ба масъалаи муқовимат ба савдои одамон суханронӣ намуда, доир ба чораҳои амалигардида ва натиҷаҳои бадастомада маълумоти мушаххас пешниҳод карданд.

Ҷаласаро Раиси шаҳр Даврон Зоҳидзода ҷамъбаст намуда, ҷиҳати бартараф намудани мушкилоту камбудиҳои ҷойдошта ва тақвияти фаъолияти минбаъда дар ин самти муҳим ба масъулини дахлдор супоришҳои мушаххас дод.