Санаи 11 феврали соли 2026 тибқи Нақшаи чорабиниҳои тасдиқнамудаи Раиси вилоят, Раиси Шӯрои Ҳаракати ҷамъиятии ваҳдати миллӣ ва эҳёи Тоҷикистон дар вилояти Суғд муҳтарам Раҷаб Аҳмадзода, ба ифтихори Рӯзи таъсисёбии Қувваҳои Мусаллаҳи Ҷумҳурии Тоҷикистон мулоқоти ҳайати таблиғотии Шӯрои вилоятӣ ва шаҳрии Ҳаракати ҷамъиятии ваҳдати миллӣ ва эҳёи Тоҷикистон дар шаҳри Конибодом бо сарбозону афсарони қисми ҳарбии 04080 баргузор гардид.

Дар мулоқоти мазкур намояндагон аз Шӯрои вилоятии Ҳаракати ҷамъиятии ваҳдати миллӣ ва эҳёи Тоҷикистон Миркамолов М. ва Мирзоқулов М., аз Шӯрои шаҳрии Ҳаракат — мудири бахши бойгонии мақомоти иҷроияи ҳокимияти давлатии шаҳр Маҳмудов Б., инчунин муовини озоди Раиси Шӯрои Ҳаракати ҷамъиятии ваҳдати миллӣ ва эҳёи Тоҷикистон Ашурматзода З. иштирок ва суханронӣ намуданд.

Мулоқот бо сухани ифтитоҳӣ оғоз гардида, зимни он таъкид шуд, ки таъсисёбии Қувваҳои Мусаллаҳи Ҷумҳурии Тоҷикистон аз дастовардҳои муҳими даврони соҳибистиқлолӣ ба шумор рафта, Артиши миллӣ имрӯз ҳамчун сипари боэътимоди давлату миллат вазифаи муқаддаси худ — ҳифзи марзу буми Ватан, таъмини сулҳу субот ва амнияти кишварро — бо сарбаландӣ иҷро менамояд.

Баромадкунандагон оид ба нақши Қувваҳои Мусаллаҳ дар таҳкими истиқлоли давлатӣ ва ваҳдати миллӣ, мактаби ҷасорату мардонагӣ будани хизмат дар сафи Артиши миллӣ, инчунин доир ба тарбияи ҷавонон дар рӯҳияи худшиносии миллӣ, эҳтиром ба арзишҳои давлатдорӣ ва таҳкими пояҳои маънавию ахлоқӣ андешаронӣ карданд. Ҳамчунин қайд гардид, ки баланд бардоштани ҳисси ватандӯстӣ ва ифтихор аз давлатдории миллӣ омили муҳими пойдории сулҳу субот ва ваҳдати ҷомеа мебошад.

Хизмат дар сафи Қувваҳои Мусаллаҳ ифтихори баланд ва масъулияти бузург буда, ҳар як сарбоз бояд бо ҳисси баланди ватандӯстӣ ва садоқат ба Савганди ҳарбӣ дар ҳифзи марзу буми Ватан саҳми арзандаи худро гузорад.

Мулоқот дар фазои самимӣ ва рӯҳияи баланди ватандӯстӣ баргузор гардида, дар фарҷом чанде аз сарбозон бо Сипоснома ва туҳфаҳои хотиравии Раиси Шӯро бахшида ба муносибати Рӯзи таъсисёбии Қувваҳои Мусаллаҳи Ҷумҳурии Тоҷикистон сарфароз гардонида шуданд.