Ҳамасола тибқи Қатъномаи Маҷмааи умумии Созмони Милали Муттаҳид аз 20 декабри соли 2022 таҳти рақами 77/243, рӯзи 12 феврал ҳамчун “Рӯзи байналмилалии пешгирии экстремизми хушунатомез, ки замина барои терроризм мешавад” эълон гардида, дар саросари ҷаҳон таҷлил мегардад.

Дар ин замина, тибқи мактуби мақомоти Прокуратура ва нақшаи чорабиниҳои мақомоти иҷроияи ҳокимияти давлатии шаҳр, дар қасри фарҳанги шаҳр чорабинии таблиғотию фаҳмондадиҳӣ баргузор гардид. Дар чорабинӣ мудири бахши дин, танзими анъана ва ҷашну маросим Султонова М., сархатиби масҷиди ҷомеаи марказии “Сарв” Аброров А., мушовири фанни таърихи шуъбаи маорифи шаҳр Шерматов Т., мутахассисони пешбари шуъбаи рушди иҷтимоӣ ва робита бо ҷомеа Тоҷибоев Б. ва Сатторов А. иштирок намуда, бо маърӯзаҳо баромад карданд.

Зимни баромадҳо мазмуну мафҳуми мафҳумҳои “терроризм”, “экстремизм” ва “ифротгароӣ” шарҳ дода шуда, таъкид гардид, ки пешгирии шомилшавии ҷавонон ба гурӯҳҳои тундрав, тарбияи насли наврас дар рӯҳияи ватандӯстиву худшиносии миллӣ, баланд бардоштани маърифати ҳуқуқии шаҳрвандон ва таҳкими сулҳу субот аз вазифаҳои муҳими ҷомеа ба ҳисоб мераванд.

Ҳамчунин зикр карда шуд, ки танҳо тавассути ҳамкории муассисаҳои таълимӣ, оила ва ҷомеа метавон ҷавононро аз таъсири андешаҳои ифротӣ эмин нигоҳ дошт ва онҳоро ба роҳи созандагиву бунёдкорӣ ҳидоят намуд.

Дар анҷоми чорабинӣ аз ҷониби аҳли фарҳанги шаҳр барномаи рангини консертӣ пешкаши ҳозирин гардида, фазои фарҳангиву маърифатии чорабинӣ боз ҳам ғанӣ гардонида шуд.