Дар муассисаи таҳсилоти миёнаи умумии №5 мулоқоти навбатӣ дар доираи вохӯриҳо бо усули «мактаб ба мактаб» баргузор гардид. Дар он намояндагони мақомоти маҳаллӣ, ҷомеаи омӯзгорону хонандагон, волидайни онҳо ва ҳамчунин муаллими калони Академияи Вазорати корҳои дохилии Ҷумҳурии Тоҷикистон Ревазода Муқаддас иштирок намуда, суханронӣ карданд.

Баромадҳо дар иртибот бо муҳтавои Паёми Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Маҷлиси Олии Ҷумҳурии Тоҷикистон сурат гирифта, масъалаҳои муҳими ҳаёти ҷомеа мавриди баррасӣ қарор дода шуданд.

Таваҷҷуҳи асосӣ ба баланд бардоштани масъулиятшиносӣ дар раванди таълим, тақвияти ҳамкории падару модарон бо ҷомеаи омӯзгорон дар беҳтар намудани сифати таълиму тарбия, пешгирии гаравидани ҷавонон ба ҳизбу ҳаракатҳои мамнӯъ, бедор намудани шавқу рағбат ба омӯзиши амиқи фанҳо, иштироки фаъолона дар озмунҳо ва ҳиссагузории аҳли ҷомеа дар ободонии шаҳру маҳалли зист равона гардид.

Дар соли таърихии таҷлили ҷашни бузурги 35-солагии Истиқлолияти давлатӣ хулосаи асосии мулоқот даъват ба талоши боз ҳам аҳлона ва масъулона барои фардои дурахшони Ватани азиз буд.