Қарори навбатии Раиси вилояти Суғд Раҷаб Аҳмадзода "Дар бораи ташкил ва гузаронидани даври вилоятии озмуни ҷумҳуриявии “Шоҳномахонӣ” ба тасвиб расид.

Тибқи қарор даври вилоятии озмуни ҷумҳуриявии «Шоҳномахонӣ» нимаи дуюми моҳи сентябри соли 2026 дар Китобхонаи вилоятии ба номи Тошхоҷа Асирӣ баргузор мегардад. Ҳадафи озмун тарғиби мероси бузурги адабии халқи тоҷик, эҳёи худшиносии миллӣ, баланд бардоштани сатҳи маърифат ва завқи адабии ҷомеа, бахусус ҷавонон мебошад.

Озмун аз рӯи шаш гурӯҳ ва як номинатсия доир гардида, дар он хонандагони синфҳои ибтидоии муассисаҳои таҳсилоти миёнаи умумӣ (синфҳои 1–4), хонандагони синфҳои 5–8 ва 9–11, донишҷӯёни муассисаҳои таҳсилоти миёна ва олии касбӣ, омӯзгорони ҳамаи зинаҳои таҳсилот, ходимони илмию адабӣ ва эҷодӣ, кормандони соҳаҳои фарҳангу санъат, аспирантон, унвонҷӯён, номзадони илм ва докторантҳо, инчунин калонсолон ва намояндагони касбу кори гуногун иштирок менамоянд.

Ба ғолибони ҷойҳои якум, дуюм ва сеюм мутаносибан 10 000, 6 000 ва 4 000 сомонӣ мукофотпулӣ пешбинӣ шудааст.

Барои баргузории даври вилоятии озмун 404 ҳазору 240 сомонӣ ҷудо гардидааст.

Ёдовар мешавем, ки озмуни ҷумҳуриявии «Шоҳномахонӣ» ба ифтихори 35 - солагии ҷашни муқаддаси миллиамон – Истиқлоли давлатии Ҷумҳурии Тоҷикистон зери сарпарастии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бо мақсади таҳкими ҳамаҷонибаи ҳувияти миллӣ, арҷгузорӣ ба таърихи пурифтихори миллати тоҷик, омӯзиши амиқу ҳамаҷонибаи корномаҳои шоистаи ниёгонамон дар тӯли таърих, тақвияти ҳисси худогоҳӣ ва худшиносии миллӣ, эҳёи ҳофизаи таърихӣ ва бо ҳамин роҳ шинохти беҳтари нақши миллати куҳанбунёду фарҳангсолори тоҷик дар рушди тамаддуни инсоният, ки бо далелҳои раднопазир ва бо такя ба сарчашмаҳои илмиву таърихӣ дар асари мондагору пурарзиши ҳаким Абдулқосими Фирдавсӣ - «Шоҳнома» инъикос ёфтааст, баргузор мешавад.