Санаи 5 - уми январи соли 2026 ҷаласаи кории мақомоти иҷроияи ҳокимияти давлатии шаҳр таҳти роҳбарии Раиси шаҳр Зоҳидзода Даврони Абдуқодир баргузор гардид.

Дар ҷаласа якчанд масъалаҳои муҳиму мубрами рӯз, қабл аз ҳама вусъат бахшидани корҳои сохтмонӣ дар иншоотҳои ҷашнӣ бахшида ба 35 - солагии Истиқлоли давлатии Ҷумҳурии Тоҷикистон, поён бахшидани корҳои боқимондаи саҳроӣ, сарфи назар аз он, ки нақшаи андози шаҳр барзиёд таъмин гардидааст, бартараф намудани норасоиҳо дар ҷамъоварии андоз аз ҷониби ҷамоатҳои деҳот, таҳияи нақшаи таҷлили ҷашнҳои миллию давлатӣ дар соли 2026, масъалаҳои марбут ба омодагӣ ба маъракаи даъвати баҳорона, инчунин оғози марҳилаи нави мулоқотҳои муштарак аз рӯи усулҳои “Деҳа ба деҳа”, “Маҳалла ба маҳалла”, “Мактаб ба мактаб” ва дигар масъалаҳо мавриди таваҷҷӯҳ қарор дода шуда, дар назди масъулин барои иҷрои босамари онҳо вазифаҳои мушаххас гузошта шуданд.

Дар ниҳоят, Раиси шаҳр Даврон Зоҳидзода аз ҳозирин ва масъулини дахлдор даъват ба амал овард, ки аз рӯзҳои аввали соли 2026 баҳри амалӣ намудани дастуру супоришҳои Асосгузори сулҳу ваҳдати миллӣ - Пешвои миллат Президенти Ҷумҳурии Тоҷикистон муҳтарам Эмомалӣ Раҳмон, ки аз Паёмашон ба Маҷлиси Олии кишвар бармеоянд камари ҳаммат баста, барои вусъат додани корҳои ободониву созандагӣ дар шаҳр чораву тадбирҳои саривақтӣ андешанд.