Ба ифтихори 80-солагии Пирӯзии халқи Чин дар Ҷанги муқовимат зидди истилогарони ҷопонӣ ва Ғалаба дар Ҷанги ҷаҳонии дуюм, Сафорати Ҷумҳурии Мардумии Чин дар Тоҷикистон ду тан қаҳрамонпадарон - Маҳкамов Абдуваҳоб ва Раҳимов Абдусаттор, сокинони Ҷамоати деҳоти Куҳандиёрро бо Ифтихономаи фахрӣ сарфароз гардонид.Онро ба фарзандони мавсуф супориданд.

Маҳкамов Абдуваҳоб ва Раҳимов Абдусаттор дар солҳои мудҳиши ҷанг бо шуҷоату матонат хизмати содиқона карданд.

Маросими супоридани Ифтихономаи Сафорати Чин ва туҳфаи пулии шаҳрдор Зоҳидзода Даврони Абдуқодирро намояндаи Мақомоти иҷроияи ҳокимияти давлатии шаҳри Конибодом, Раиси Шӯрои собиқадорони ҷангу меҳнат Наимҷон Ғаниев бар ӯҳда доштанд.

Наимҷон Ғаниев зимни суханронӣ таъкид намуд, ки «хизмат ба Ватан шарафи бузург аст ва ҳар нафари ватандӯст, новобаста ба насл ва синнусол, бояд аз фидокориҳои наслҳои гузаштаи худ ифтихор дошта бошад». Ӯ инчунин иброз дошт, ки ҷасорат, садоқат ба миллат ва мубориза барои сулҳ хислатҳоеанд, ки бояд дар қалби ҳар як ҷавон парвариш ёбанд.

Ин қадрёбӣ бори дигар собит сохт, ки номи нек ва хизматҳои содиқона ба Ватан ҳаргиз аз ёдҳо намеравад. Хизматҳои беназири падару бобоёни мо дар роҳи озодӣ ва сулҳ ҳаргиз фаромӯш намешаванд ва ҳамчун мактаби ҷасорату ватанпарастӣ барои насли имрӯзӣ боқӣ мемонанд.