Имрӯз дар шаҳраки 23 маҳаллаи ба номи Э.Обидов мулоқот бо сокинон доир гардид.

Мулоқотро муовини якуми Раиси шаҳр Шӯҳрат Шокирӣ оғоз намуд ва вобаста ба мӯҳтавои Қонуни Ҷумҳурии Тоҷикистон "Дар бораи танзими ҷашну маросим дар Ҷумҳурии Тоҷикистон", "Дар бораи масъулият барои таълиму тарбияи кӯдак", " Дар бораи тарбияи ватандӯстии шаҳрвандон" сухан гуфт.

Дар мулоқот мудири шуъбаи рушди иҷтимоӣ ва робита бо ҷомеаи дастгоҳи Раиси шаҳр Баҳодур Маҳмудов, мудири шуъбаи кор бо ҷавонони КИ ҲХДТ дар шаҳри Конибодом Муҳаммад Шокирӣ, иштирок ва суханронӣ намуданд.

Дар идома баромадкунандагон дар бораи ворид гардидани тағирот ба Кодекси ҷиноятӣ ва ҳуқуқвайронкунии маъмурии Ҷумҳурии Тоҷикистон оид ба истифодаи нерӯи барқ,таълиму тарбияи насли наврасу ҷавон, баланд бардоштани ҷаҳонбинии ахлоқиву фарҳангӣ, ободонии маҳал ва даъвати ҷавонон ба хизмати ҳарбӣ суханронӣ намуданд.

Инчунин таъкид гардид, ки минбаъд саривақт насупоридани маблағи истифодаи неруи барқ, тағйири нишондоди таҷҳизоти ҳисоби барқ ва ё бепайвасткунӣ ба чунин таҷҳизот ва дар натиҷа барои вайрон кардани қоида ва меъёрҳои истифодаи қувваи барқ ҷаримаҳо афзуда, (ба андозаи 365 то 1200 нишондиҳанда) ҳатто аз озодӣ маҳрум шудан(аз 3 то 10 сол) мумкин аст.

Дар охир аз ҷониби сокинон оид ба масъалаҳои матраҳ шуда саволу ҷавобҳо сурат гирифт.