Имрӯз дар деҳаҳои Маҳрам ва Ниёзбеки ҷамоати деҳоти Кӯҳандиёр мулоқот бо сокинон ва фаъолон доир гардид.

Мулоқотро мудири шӯъбаи рушди иҷтимоӣ ва робита бо ҷомеаи дастгоҳи Раиси шаҳр Баҳодур Маҳмудов оғоз намуда оид ба яке аз масъалаҳои мубрами рӯз ворид гардидани тағирот ба Кодекси ҷиноятӣ ва ҳуқуқвайронкунии маъмурии Ҷумҳурии Тоҷикистон оид ба истифодаи нерӯи барқ суханронӣ намуд.

Инчунин, таъкид гардид, ки минбаъд саривақт насупоридани маблағи истифодаи неруи барқ, тағйири нишондоди таҷҳизоти ҳисоби барқ ва ё бепайвасткунӣ ба чунин таҷҳизот ва дар натиҷа барои вайрон кардани қоида ва меъёрҳои истифодаи қувваи барқ ҷаримаҳо афзуда, (ба андозаи 365 то 1200 нишондиҳанда) ҳатто аз озодӣ маҳрум шудан (аз 3 то 10 сол) муқаррар гардидааст.

Дар идома, мудири бахши муҳоҷират Фарзона Толибова вобаста ба масъалаҳои муҳоҷирати меҳнатӣ ва дар бораи огоҳ будани муҳоҷирон аз қонунҳои нави давлатҳои хориҷа, омӯзиши забонҳои хориҷӣ ва якчанд масъалаҳои муҳими ин самт, сабабу омилҳои хориҷ шудани муҳоҷирони меҳнат аз Федератсияи Русия сухан гуфт.

Ҳамчунин, мудири шӯъбаи ташкилии КИ ҲХДТ дар шаҳри Конибодом Акмал Ализода вобаста ба масъалаҳои мубрами рӯз аз ҷумла хусусан ба масъалаҳои таълиму тарбияи насли наврасу ҷавон, баланд бардоштани ҷаҳонбинии ахлоқиву фарҳангӣ, ободонии маҳал ва даъвати ҷавонон ба хизмати ҳарбӣ ибрози ақида намуд.

Инчунин, сармутахассиси шӯъбаи рушди иҷтимоӣ ва робита бо ҷомеаи дастгоҳи Раиси шаҳр Искандар Толибов вобаста ба мӯҳтавои қонунҳои Ҷумҳурии Тоҷикистон "Дар бораи танзими ҷашну маросим дар Ҷумҳурии Тоҷикистон", "Дар бораи масъулият барои таълиму тарбияи кӯдак", "Дар бораи тарбияи ватандӯстии шаҳрвандон" ҳарф зад.

Дар охир аз ҷониби сокинон оид ба масъалаҳои матраҳшуда саволу ҷавобҳо сурат гирифт.