Имрӯз дар деҳаи Диловарони ҷамоати деҳоти Фирӯзоба мулоқот бо сокинон ва фаъолон доир гардид.

Мулоқотро Раиси шаҳри Конибодом Даврон Зоҳидзода оғоз намуда, афзуд, ки санаи 17-уми майи соли равон дар ноҳияи Данғара Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, Ҷаноби Олӣ муҳтарам Эмомалӣ Раҳмон бо фаъолони кишвар мулоқот намуда, вазъи иқтисодӣ, хусусан соҳаҳои саноат ва кишоварзии мамлакатро мавриди баррасиву муҳокимаи амиқ қарор доданд.

Инчунин раиси шаҳр гуфта гузашт, ки чунонеи Пешвои муаззами миллат таъкид доштанд, вазъи буҳронии ҷаҳони имрӯза ва дигар мушкилоте, ки ҳоло инсоният бо онҳо рӯ ба рӯ омадааст, мову шуморо водор месозанд, ки тамоми захираҳо, имкониятҳо ва неруи худро ба хотири расидан ба ҳадафу нақшаҳои дар наздамон қарордошта – таъмини рушди минбаъдаи давлат, ободии Ватан ва мунтазам беҳтар гардонидани шароити зиндагии ҳар як оила сафарбар созем.

Дар идома Прокурори шаҳри Конибодом, мушовири давлатии адлияи дараҷаи 3 Орифзода Парвиз Рустам баромад намуда, вобаста ба яке аз масъалаҳои мубрами рӯз — ворид гардидани тағйирот ба Кодекси ҷиноятӣ ва ҳуқуқвайронкунии маъмурии Ҷумҳурии Тоҷикистон оид ба истифодаи нерӯи барқ суханронӣ намуд.

Инчунин таъкид гардид, ки минбаъд сари вақт насупоридани маблағи истифодаи нерӯи барқ, тағйири нишондоди таҷҳизоти ҳисоби барқ ва ё бепайвасткунӣ ба чунин таҷҳизот ва дар натиҷа барои вайрон кардани қоида ва меъёрҳои истифодаи қувваи барқ ҷаримаҳо афзуда (ба андозаи 365 то 1200 нишондиҳанда), ҳатто аз озодӣ маҳрум шудан (аз 3 то 10 сол) мумкин аст.

Дар охир, аз ҷониби сокинон оид ба масъалаҳои матраҳшуда саволу ҷавобҳо сурат гирифта, ҷавобҳои мушаххас аз ҷониби масъулини соҳаҳо дода шуд.

Муаллиф: Искандар Толибов