Дар партави сиёсати варзишпарварона ва хирадмандонаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ҷиҳати тарғиби тарзи ҳаёти солим ва рушди варзиш, субҳи 18 майи соли 2025 дар шаҳри Конибодом бахшида ба Рӯзи ҷавонони Тоҷикистон маъракаи оммавии Дави миллӣ ва марафони велосипедронӣ баргузор гардид.

Чорабинии варзишӣ бо иштироки фаъолонаи сокинон, ҷавонон, варзишгарон, намояндагони касбу кори гуногун ва меҳмонон дар фазои идона баргузор шуда, бозгӯгари оммавият ва дӯстдории варзиш миёни ҷомеа мебошад.

Дар қисмати тантанавии чорабинӣ раиси шаҳр Даврон Зоҳидзода иштирокчиёнро бо Рӯзи ҷавонон ва оғози Дави миллӣ табрик намуда, аз таваҷҷуҳи доимии Ҳукумати мамлакат ба рушди соҳаи варзиш ва дастгирии ҳамаҷонибаи насли наврас ёдовар шуд. Зикр гардид, ки ҷавонон ҳамчун нерӯи созандаи ҷомеа бояд дар посух ба ин ғамхориҳо дар роҳи рушди Ватан ва таҳкими ваҳдати миллӣ саҳми босазо гузоранд.

Мақсади асосии баргузории Дави миллӣ ва марафони велосипедронӣ таҳкими тарзи ҳаёти солим, баланд бардоштани маърифати варзишии шаҳрвандон ва ҷалби бештари аҳолӣ ба фаъолиятҳои ҷисмонӣ мебошад. Иштирокчиён дар фазои дӯстию ҳамбастагӣ ва руҳияи баланди ватандӯстӣ масофаҳои муайяншударо тай намуда, пайвандии варзишу ваҳдатро ба намоиш гузоштанд.

Баргузории чунин чорабиниҳои оммавӣ дар шаҳри Конибодом шаҳодати таваҷҷуҳи махсуси мақомоти маҳаллӣ ба рушди ҷисмонӣ ва маънавии ҷавонон буда, ба анъанаи нек ва муҳими ҳарсола табдил ёфтааст.

Дар ҷамъбасти чорабинӣ ғолибон муайян гардида, бо диплом ва туҳфаҳои хотиравӣ қадрдонӣ гардиданд.

Муаллиф: Н. Умаров

Акс: Ф. Муқимов