Имрӯз дар меҳмонхонаи "Кангурт"-и шаҳри Душанбе маросими ҷамъбастии озмуни ҷумҳуриявии “Оилаи беҳтарин” баргузор гардид. Озмун бо ташаббуси Кумитаи кор бо занон ва оилаи назди Ҳукумати Ҷумҳурии Тоҷикистон ва бо ҳамкории Вазорати адлия, Кумитаи дин ва танзими ҷашну маросимҳо, инчунин Хазинаи нуфуси СММ дар Тоҷикистон бахшида ба Рӯзи байналмилалии оила баргузор шуд.

Дар оғоз муовини Сарвазири Ҷумҳурии Тоҷикистон хонум Мансурӣ Дилрабо ва раиси Кумитаи кор бо занон ва оила Бунафша Файзиддинзода суханронӣ намуда, ҳозиринро бо ин ид табрик карданд. Онҳо таъкид намуданд, ки оила ҳамчун пояи муҳими ҷомеа нақши созгор дар таҳкими арзишҳои миллӣ ва рушди давлатдорӣ дорад.

Ғолибон ва иштирокчиёни фаъоли озмун бо шоҳҷоиза, диплом, сипоснома ва туҳфаҳои хотиравии Кумитаи кор бо занон ва оила сарфароз гардонида шуданд.

Дар миёни беҳтаринҳо, Оилаи Обидов — Иномхон ва Кибриё Обидова аз шаҳри Конибодом сазовори ҷойи аввал дониста шуданд.Чунин озмунҳо дар таҳкими муносибатҳои солими оилавӣ ва баланд бардоштани мақоми зан дар ҷомеа мусоидат менамоянд.