Бо мақсади коҳиш додани талафоти нерӯи барқ, ҷамъоварии пурраи ҳаққи истифода ва пешгирии истифодаи худсаронаи нерӯи барқ, дар шаҳри Конибодом тадбирҳои муштарак роҳандозӣ гардиданд.

Муовини раиси Шӯрои шаҳрии Ҳаракати ҷамъиятии ваҳдати миллӣ ва эҳёи Тоҷикистон Замира Ашурматова ва роҳбари тиҷоратии Шабакаҳои барқи шаҳри Конибодом Бахтиёр Арзиқулов бо истифода аз усули “хона ба хона” миёни сокинон корҳои фаҳмондадиҳӣ мебаранд.

Ин иқдом дар партави дастуру супоришҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон амалӣ гардида, ҳадафи он пешгирии истифодаи ғайриқонунии нерӯи барқ ва таъмини пардохти саривақтии ҳаққи истифода мебошад.

Бо ин мақсад, гурӯҳҳои корӣ аз ҳисоби муовинони раиси шаҳр, раисони ҷамоатҳои деҳот ва фаъолон таъсис ёфта, корҳои фаҳмондадиҳиро дар байни аҳолӣ бо шеваи фардӣ ба роҳ мондаанд.

Мақомоти иҷроияи ҳокимияти давлатии шаҳр татбиқи чунин тадбирҳоро дар самти истифодаи самаранок ва қонунии нерӯи барқ муҳиму саривақтӣ арзёбӣ менамояд.