Бо супориши мақомоти иҷроияи ҳокимияти давлатии шаҳри Конибодом имрӯзҳо гузаргоҳҳои пиёдагард дар кӯчаву хиёбонҳои шаҳр аз нав рангу бор карда шуда истодаанд. Ин иқдом бо мақсади баланд бардоштани сатҳи бехатарии ҳаракати роҳ, махсусан барои пиёдагардон, роҳандозӣ гардида, ба тартиб ва муназзамии ҳаракат дар роҳҳо мусоидат хоҳад кард. Тадбири мазкур аз ҷониби Муассисаи нигоҳдории давлатии роҳҳои автомобилии шаҳри Конибодом амалӣ шуда истодааст. Дар доираи он кормандони муассиса ба рангубори дубораи гузаргоҳҳои пиёдагард, навсозии хатҳои роҳнамо ва беҳсозии нишонаҳои роҳ машғул мебошанд. Ин чорабинӣ ҷузъи тадбирҳои ҳаматарафаи мақомоти иҷроияи ҳокимияти давлатӣ ба ҳисоб рафта, ба таъмини амнияти роҳ ва беҳдошти муҳити шаҳр равона шудааст.