Дар доираи татбиқи дастуру супоришҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон оид ба маромҳои созандагиву бунёдкорӣ, аз ҷумла таъмиру таҷдиди босифати роҳҳо ба муносибати ҷашни 35-солагии Истиқлолияти давлатии Ҷумҳурии Тоҷикистон дар шаҳри Конибодом корҳои ободонию мумфаршкунӣ вусъат меёбанд.

Чунин ташаббусҳои созанда бо иштироки васеи мардум ва мусоидату дастгирии мақомоти иҷроияи ҳокимияти давлатии шаҳр дар ҷамоати деҳоти Куҳандиёр низ амалӣ мешаванд. Аз ҷумла, роҳи кӯчаи маҳаллаи ба номи Абдураҳмон Ҷомӣ ба масофаи 1 километр пурра мумфарш карда мешавад.

Иқдоми мазкур бо дастгирии мақомоти маҳаллӣ ва иштироки фаъолонаи сокинон амалӣ гардида, дар ин роҳ саҳмгузории афроди худшиносу ватандӯст, ки ҳатто маблағи ҷамъовардаашон барои сафари ҳаҷро харҷ менамоянд, рӯз то рӯз афзуда, далели возеҳи пиёданамоии ҳидоятҳои созандагии Пешвои маҳбуби миллат мебошад. Бино ба иттилои сокинони маҳалла,харобии роҳ ба рафтуомади сокинон, хусусан дар рӯзҳои боронӣ, монеа эҷод мекард. Бо татбиқи ин иқдом, мушкилоти сокинон бартараф гардида, роҳи нав бо сифати баланд ва мутобиқ ба меъёрҳои техникӣ аз ҷониби Муассисаи давлатии нигоҳдории роҳҳои шаҳри Конибодом мумфарш мегардад.

Масъулин изҳор медоранд, ки корҳои таъмири роҳҳо дар дигар маҳаллаҳои шаҳр низ марҳила ба марҳила амалӣ хоҳанд шуд.

Раиси шаҳр Даврон Зоҳидзода зимни боздид ва суҳбат бо сокинон изҳори сипос намуда, қайд кард, ки чунин ҳамбастагии мардум бо мақомоти давлатӣ нишонаи беҳтарини ваҳдати миллӣ, пуштибонии комил аз сиёсати Ҳукумати кишвар ва эҳсоси баланди масъулиятшиносӣ дар назди Ватан аст.