Тибқи нақша-чорабиниҳои мақомоти иҷроияи ҳокимияти давлатии шаҳр имрӯз дар деҳаи Фирӯзоба 2-и ҷамоати деҳоти Фирӯзоба мулоқот бо сокинону фаъолон доир гардид.

Мулоқотро мудири шуъбаи рушди иҷтимоӣ ва робита бо ҷомеаи дастгоҳи раиси шаҳр Маҳмудов Баҳодур оғоз намуда, ҳозиринро бо нақшаи муштараки мақомоти иҷроияи ҳокимияти давлатии шаҳр дар самти рушди иҷтимоӣ ва робита бо ҷомеа, ки аз ҷониби Раиси шаҳр тасдиқ шудааст шинос намуда оид ба муҳтавои Қонуни Ҷумҳурии Тоҷикистон “Дар бораи тарбияи ватандӯстии шаҳрвандон”, "Дар бораи ворид намудани тағйир ба Кодекси ҳуқуқвайронкунии маъмурии Ҷумҳурии Тоҷикистон" моддаи 382 " Риоя накардани қоидаҳои истифодаи қувваи барқ ва гармӣ" суханронӣ намуд.

Сипас мудири бахши хадамоти муҳоҷират дар шаҳри Конибодом Толибова Фарзона вобаста ба омӯзиши касбу хунар, омӯзиши забонҳои хориҷӣ ва камбудиҳое, ки аз ҷониби муҳоҷирон дар Федератсияи Руссия ба назар мерасад маълумот ироа намуд.

Инчунин сармутахассиси шуъбаи рушди иҷтимоӣ ва робита бо ҷомеаи дастгоҳи раиси шаҳр Толибов Искандар доир ба масъалаҳои мубрами рӯз аз ҷумла пешгирии шомилшавии ҷавонон ба ҳизбу ҳаракатҳои ифротӣ - экстремистӣ террористӣ, тарбияи ҷавонон дар рӯҳияи ватандӯстӣ, даъвати ҷавонон ба сафи Қувваҳои Мусаллаҳ, масъулияти падару модар дар тарбияи фарзанд ва бедор намудани ҳисси ватандӯстӣ гуфта гузашт.

Дар охир аз ҷониби сокинони деҳа саволҳо пешниҳод шуда, аз ҷониби масъулин ҷавобҳои мушаххас дода шуд. Чунин мулоқоту вохӯриҳо дар дигар ҷамоату деҳоти шаҳр баргузор карда мешавад.