Субҳи имрӯз бо иштироки Раиси шаҳри Конибодом Даврон Зоҳидзода дар муассисаи таҳсилоти миёнаи умумии рақами 16 ба номи Неъмат Қаробоев барои бунёди ошхонаи нав санги асос гузошта шуд. Тадбири мазкур дар доираи корҳои созандагиву бунёдкорӣ ба муносибати 35-солагии Истиқлоли давлатӣ аз ҷониби кумитаи падару модарони муассиса ба нақша гирифта шуда, тариқи ҳашар сохта мешавад. Тавре ба шаҳрдор иттилооъ доданд, ошхонаи муассисаи таълимӣ, ки айни замон фаъолият дорад, солҳо инҷониб дар ҳолати садамавӣ қарор дорад. Бунёди ошхонаи нав имкон медиҳад, ки хонандагон дар ҳама фасли сол аз бинои таълимӣ берун набаромада, аз хизматрасонии ошхона баҳрабардорӣ созанд. Дар ин кори хайр инчунин, сокини 74-солаи деҳа Файзуллоҷон Солиев маблағҳои солҳо бо нияти Ҳаҷ ҷамъовардашро барои корҳои сохтмонӣ бахшид.

Ин иқдом нишонаи ҳамбастагӣ ва эҳсоси масъулияти ҷомеа нисбат ба таълиму тарбияи насли ҷавон ва татбиқи ҳидоятҳои созандагии Пешвои муаззами миллат буда, бунёди ошхона ба беҳбудии шароити рӯзгор ва таҳсили хонандагон хизмат хоҳад кард.

Дар фарҷом Раиси шаҳр Даврон Зоҳидзода барои ташаббус ва иқдоми хайрхоҳонаи сокинони маҳал ва саховатманд изҳори миннатдорӣ намуда, барои саривақт ва бо сифати хуб анҷом додани корҳои сохтмонӣ дастур дод.