Дастгирии соҳибкорон ва рушди соҳибкорӣ ҳамеша дар меҳвари таваҷҷуҳи Президенти кишвар, муҳтарам Эмомалӣ Раҳмон қарор дорад. Сарвари давлат иқдоми соҳибкорони ватандўсти кишварро ситоиш намуда, саҳми эшонро дар бунёди коргоҳу иншоотҳо ва таъсиси ҷойҳои нави корӣ назаррас арзёбӣ мекунанд.

Бо иқдоми соҳибкори ватандўсту ҷавон Суҳроб Акпаров ифтитоҳ гардидани қаҳвахонаи «Шоҳсарой» бо 120 ҷойи нишаст илҳом аз дастгириҳои Пешвои муаззами миллат ва идомаи созандагиҳои ин ҷавони ободгар аст. Қаҳвахона дар ошёнаи якуми тарабхонаи «Шоҳсарой» ҷой гирифта, ҳамарўза бо омода намудани таомҳои милливу аврупоӣ интизори мизоҷон аст.

Ба фаъолият шуруъ намудани қаҳвахона 10 нафари бе шуғлро бо ҷойи кори доимӣ таъмин намуд.

Шаҳрдор Даврон Зоҳидзода дар маросими ифтитоҳи қаҳвахона ширкат варзида, ташаббуси соҳибкори ҷавон, вакили Маҷлиси вакилони халқи шаҳр Сӯҳроб Акпаровро шоистаи пайравию дастгирӣ маънидод намуд ва дар идомаи иқдомҳои наҷибаш барору комёбиҳо таманно кард.