Имрӯз ба муносибати гусели гурӯҳи аввалини ихтиёриёну наваскарон дар майдони Исмоили Сомонӣ ҷамъомади тантанавӣ баргузор гардид. То оғози чорабинӣ гурӯҳи калони ҷавонони фаъол, варзишгарон, гирандагони идрори Президентӣ, хонандагони муассисаҳои таълимӣ ва ҷавонони пешсаф дар даст Парчам ва шиорҳои ватандӯстона ба ҷашнгоҳ ҳозир шуданд.

Нахуст иҷрокунандаи вазифаи Раиси шаҳри Конибодом Даврон Зоҳидзода суханронӣ намуда, хизмат дар сафи Қувваҳои Мусаллаҳро мактаби ҷавонмардиву шуҷоат ва қарзи фарзандии ҳар як ҷавони баору номус маънидод кард ва ба хизмати наваскарон барору комёбӣ орзу намуд. Номбурда роҷеъ ба ташкил ва ташаккули Қувваҳои мусаллаҳи кишвар таҳти роҳбарии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, Сарфармондеҳи Олии Қувваҳои мусаллаҳ муҳтарам Эмомалӣ Раҳмон ҳарф зада, аз шароитҳои мусоиду муосири Қувваҳои мусаллаҳи мамлакат ёдовар гардид.

Ҳамчунин раиси шӯрои собиқадорони ҷангу меҳнати шаҳр Наимҷон Ғаниев, бобои даъватшаванда Юнусов Ҳусейнбой ва наваскар Исмоилов Икромҷон баромад карда, хизмат дар сафи Қувваҳои мусаллаҳро ғуруру ифтихор барои ҳар яки даъватшавандагон арзёбӣ намуданд.

Баромадкунандагон зимни суханронӣ қайд карданд, ки хизмат дар сафи Қувваҳои Мусаллаҳ қарзи ҳар як ҷавонписар дониста аз муқаддас будани Ватан- Модар ва ҳатмӣ будани хизмати ҳарбӣ ёдовар шуда, ба наваскарон бурдбориву сарбаландӣ ва музаффариятҳои беназирро таманно намуданд.

Дар охир барномаи рангини аҳли фарҳангу ҳунари шаҳр бо таронаҳои ватандӯстӣ ва оҳангҳои дилнишин таъби ҳозиринро болида намуд.