Имрӯз – 11 март ба ифтихори Рӯзи матбуоти тоҷик дар Мақомоти иҷроияи ҳокимияти давлатии шаҳр бо иштироки иҷрокунандаи вазифаи раиси шаҳр Даврон Зоҳидзода, намояндагони васоити ахбори омма, ноширон, собиқадорон ва ихлосмандони рӯзномаи шаҳрии «Садои Конибодом» ҷамъомади тантанавӣ баргузор гардид. Онро котиби Созмони шаҳрии Иттифоқи журналистони Тоҷикистон, сармуҳаррири рӯзнома Саттор Содиқов ҳусни оғоз бахшида, шаҳрдор аз таърихи пурмуҳтавои матбуоти тоҷик сухан гуфт ва дар иҷрои рисолати касбӣ ба кормандони расонаҳои хабарӣ, ҷомеаи меҳнатии матбааи шаҳр барору комёбиҳо орзу намуд.

Ҳамчунин, хабарнигорони ҷамоатии рӯзнома Заҳро Ҳайдарова ва Роҳбар Зайниддинова андешаҳои хешро нисбати рӯзнома иброз доштанд. Дар вазъияти тантанавӣ ба кормандони рӯзномаи шаҳрӣ Амонҷон Деҳқонов ва Гулчеҳра Ҷӯраева шаҳодатномаи узвият ба Иттифоқи журналистони Тоҷикистон супорида шуда, фаъолони соҳа, собиқадорон ва тарғибгарони рӯзнома бо Сипосномаи раиси шаҳр ва идораи рӯзнома қадршиносӣ шуданд.

Узви Иттифоқи журналистони Тоҷикистон Амонҷон Деҳқонов бо Ҷоизаи Созмони Иттифоқи журналистони Тоҷикистон дар шаҳри Конибодом ба номи Мавлонҷон Узоқов сарфароз гардонида шуд.