Дар асоси нақша - чорабиниҳои Мақомоти иҷроияи ҳокимияти давлатии шаҳри Конибодом имрӯзҳо мулоқоту вохӯрӣ ва боздиду натиҷабардорӣ аз вазъи шароити соҳаҳои иҷтисодиву иҷтимоӣ, иншоотҳои ҷашнӣ ва дигар ҷанбаҳои фаъолияти шаҳру деҳот баргузор гардида истодааст. Чунин вохурӣ бо сокинони ҷамоати деҳоти Пӯлотон таҳти роҳбарии иҷрокунандаи вазифаи Раиси шаҳр Зоҳидзода Даврони Абдуқодир доир гашт. Иҷрокунандаи вазифаи раиси шаҳр Паёми Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро ба Маҷлиси Олӣ «Дар бораи самтҳои асосии сиёсати дохилӣ ва хориҷии ҷумҳурӣ» шарҳ дода, қайд кард, ки Паём ҳамчун як роҳнамои амиқи сиёсиву иқтисодӣ барои рушди устувор ва таъмин намудани амнияти миллӣ хизмат мекунад. Дар он тамоюлҳои нави рушди ҷаҳонӣ ба назар гирифта шуда, ҳадафҳои стратегии кишвар, аз ҷумла таъмини амнияти озуқаворӣ, саноатикунонии босуръат ва ноил шудан ба истиқлоли энергетикӣ мавриди таҳлил қарор гирифтанд.

Ҳамчунин, вобаста ба иҷрои ҳатмии барномаҳои давлатӣ, азхудкунии заминҳои бекорхобида, бунёди муассисаҳои иҷтимоӣ махсусан, муассисаҳои таҳсилоти томактабӣ, аз таъмири хушсифат баровардани муассисаҳои фарҳангии ҳудуди ҷамоат, пешгирии шомилшавии ҷавонон ба гуруҳҳои ифротгароӣ ва таълимоти ғайрирасмии динӣ, ҷалби ҷавонписарон ба сафи Қувваҳои Мусаллаҳи Ҷумҳурии Тоҷикистон, баланд бардоштани маърифати ҳуқуқии шаҳрвандон, пешгирии пошхурии оилаҳо, бо шуғл фаро гирифтани шаҳрвандони бекор, тозаву озода нигоҳ доштани маҳалли зист, иштироки фаъолона дар маъракаи ниҳолшинонӣ, рафти иҷрои қонунҳои Ҷумҳурии Тоҷикистон “Дар бораи масъулият барои таълиму тарбияи кӯдак” ва “Дар бораи танзими ҷашну маросим дар Ҷумҳурии Тоҷикистон” ва омодагии ҳамаҷониба ба истиқболи ҷашни 35 - солагии Истиқлоли давлатии Ҷумҳурии Тоҷикистон даъват ба амал оварда шуд.

Сипас, сардори тозатаъини ШВКД дар шаҳри Конибодом подполковники милитсия Ғафурзода Аҳлиддин Маҳмадраҷаб ба сухан баромада, вобаста ба пешгирии ҳодисаҳои номатлуб шаҳрвандонро барои ҳамкорӣ даъват намуд.

Дар фарҷом иштирокдорони мулоқот бо саволу дархостҳои худ вобаста ба масъалаҳои мухталиф муроҷиат намуда, ҷавобҳои мушаххас гирифтанд.