Дар Коллеҷи омӯзгории ба номи Мирзо Турсунзодаи шаҳр ҷамъомад дар мавзуъи “Зан ва ҷомеъа” баргузор гардид. Мудири шӯъбаи кор бо занон ва оилаи Мақомоти иҷроияи ҳокимияти давлатии шаҳри Конибодом Маҳбуба Муҳитдинова доир ба нақша чорабиниҳо барои солҳои 2021- 2025 оид ба амалисозии Стратегияи миллии фаъолгардонии нақши занон дар Ҷумҳурии Тоҷикистон барои солҳои 2021- 2030 маълумот дод.

Қайд карда шуд, ки Стратегияи миллӣ барои фароҳам овардани замина ва шароити зарурӣ ва кофӣ барои пурра зоҳир намудани қобилияти занон дар ҳамаи соҳаҳои ҳаёти иҷтимоию иқтисодӣ, татбиқи сиёсати давлатии гендерӣ, механизмҳои татбиқи кафолатҳои конститутсионии баробарҳуқуқии мардону занон, пешгирӣ ва аз байн бурдани зӯроварӣ дар оила, рушди соҳибкории занон, баланд бардоштани маърифатнокии занон, таъмини иштироки васеи онҳо дар соҳаҳои ҳаёти ҷамъиятӣ мусоидат мекунад. Сипас масъалаҳои вобаста ба вазъи иҷтимоӣ ва беҳбуди шароити кору зиндагии бонувон мавриди баррасӣ қарор гирифт.