Ҳамоишро раиси шаҳр ҳусни ифтитоҳ бахшида, аҳли ҳунарро ба ифтихори иди касбиашон таҳният гуфт. Абдусалом Тӯхтасунзода аз дастовардҳои театри давлатии мусиқӣ-драмавии ба номи Туҳфа Фозиловаи шаҳри Конибодом ёдовар шуда, иброз дошт, ки ҳунармандони ин боргоҳ дар фестивалҳои гуногуни ҷумҳуриявию байналмиллалӣ иштирок намуда сазовори ҷойҳои намоён шудаанд.

Кормандони театр имрӯзҳо тарғибу ташвиқи арзишҳои миллӣ ва густариши маърифату завқи баланди мардум қарор дошта, масъалаҳои нав ва мубрами ҳаётро дар даврони истиқлол ба миён мегузоранд.

Ҳамзамон, дар чорабинӣ намояндаи мақомоти иҷроияи ҳокимияти давлатии вилояти Суғд Обидзода Нуъмонҷон, раиси КИШ ҲХДТ дар шаҳр Фируза Шерматова ва чанде аз собиқадорони соҳа ба сухан баромада, кормандони театрро бо иди касбиашон шодбош гуфтанд.

Ба ҳунармандони театр сипоснома ва туҳфаҳои Мақомоти иҷроияи ҳокимияти давлатии шаҳр тақдим карда шуд.

Ҳамасола 7 ноябр дар Ҷумҳурии Тоҷикистон Рӯзи театри тоҷик таҷлил мешавад. Тибқи сарчашмаҳои таърихӣ бори аввал дар ҳамин рӯзи соли 1929 театри тоҷик ба фаъолият оғоз намуд.