Имрӯз дар толори мақомоти иҷроияи ҳокимияти давлатии шаҳри Конибодом муаррифии муовини якуми Раиси шаҳр баргузор гардид, ки дар он Раиси шаҳри Конибодом Абдусалом Тӯхтасунзода ва намояндаи мақомоти иҷроияи ҳокимияти давлатии вилояти Суғд, мудири шуъбаи кор бо кадрҳои дастгоҳи Раиси вилояти Суғд Шарифзода Ғолибҷон иштирок намуданд. Нахуст мудири шуъбаи кор бо кадрҳои Дастгоҳи Раиси вилоят Шарифзода Ғолибҷон баромад намуда, розигии Президенти Ҷумҳурии Тоҷикистон муҳтарам Эмомалӣ Раҳмонро аз санаи 16.07.2024, таҳти рақами 28939 -15/2 дар бораи ба вазифаи муовини якуми Раиси шаҳри Конибодом таъин намудани Шокирӣ Шӯҳрат ба самъи ҳозирин расонид.

Раиси шаҳри Конибодом муҳтарам Абдусалом Тӯхтасунзода зимни суханронии худ розигии Президенти кишварро ҷиҳати ба вазифаи муовини якуми Раиси шаҳри Конибодом таъин намудани Шокирӣ Шӯҳрат аз дастгириҳои пайвастаи ҷавонон аз ҷониби Пешвои миллат арзёбӣ намуд. Ҳамзамон, ба муовини тозатаъин ҷиҳати саривақт ва самаранок татбиқ намудани сиёсати Ҳукумати мамлакат ва дастуру супоришҳои созандаву хирадмандонаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар байни ҷомеа вазифагузорӣ намуд.

Дар анҷом муовини тозатаъини Раиси шаҳр Шокирӣ Шӯҳрат ба сухан баромада, барои бовариву эътимод ба Пешвои миллат муҳтарам Эмомалӣ Раҳмон, дастгириву таваҷҷуҳи доимии Раиси вилояти Суғд муҳтарам Раҷаббой Аҳмадзода ва Раиси шаҳри Конибодом муҳтарам Абдусалом Тӯхтасунзода нисбат ба ҷавонон, ки аз сиёсати Пешвои муаззами миллат бармеояд, арзи сипос намуд.