Имруз ба муносибати Рӯзи таъсисёбии Қувваҳои мусаллаҳи Ҷумҳурии Тоҷикистон дар қасри фарҳанг ҷамъомади тантанавӣ баргузор гардид. Дар оғози чорабинӣ Раиси шаҳри Конибодом Абдусалом Тӯхтасунзода бо суханҳои табрикотӣ баромад карда, кулли сарбозону афсарон ва муҳофизони ватанро бо ин рӯзи идона табрик гуфт. Зикр гардид, ки Қувваҳои мусаллаҳи мамлакат маҳсули истиқлоли давлатӣ буда, имрӯз ба ҳайси як нерӯи пурқудрат ва сохтори боэътимоди давлату миллат хизмат мекунад. Ҳазорҳо ҷавонони содиқи ватан дар ҳифзу ҳимояи марзу буми кишвари худ садоқатмандона хизмат карда истодаанд. Раиси шаҳр ба кулли сарбозону низомиён ва дар симои онҳо ба падару модаронашон ин рузи идонаро самимона таҳният намуд.

Сипас, намояндаи Мақомоти иҷроияи ҳокимияти давлатии вилояти Суғд, Сардори Раёсати минтақавии рушди иқтисод ва савдои Мақомоти иҷроияи ҳокимияти давлатии вилояти Суғд Ҳакимзода Ҳакимҷон иштирок намуда, ҳозирин ва сарбозону афсаронро аз номи Раиси вилояти Суғд Раҷаббой Аҳмадзода шодбош гуфт.

Зимни чорабинӣ ба як гурӯҳ сарбозону афсарон ва фаъолони шаҳр сипосномаҳои мақомоти иҷроияи ҳокимияти давлатии шаҳри Конибодом ва медалхои ҷашнии Вазорати мудофиа супорида шуд.

Дар охир барномаи рангини консертӣ аз тарафи аҳли ҳунар пешкаши ҳозирин гардонида шуд.