Дар мақомоти иҷроияи ҳокимияти давлатии шаҳр таҳти раёсати муовини Раиси шаҳр О.Охунзода ва бо иштироки фаъолон, собиқадорон, ҷавонони пешсаф ҷаласаи ҷамъбастии фаъолияти Шӯрои ҷамъиятии Ҳаракати ваҳдати миллӣ ва эҳёи Тоҷикистон дар шаҳри Конибодом баргузор гардид. Онро бо суханҳои ифтитоҳӣ муовини озоди Шӯрои ҷамъиятии Ҳаракати ваҳдати миллӣ ва эҳёи Тоҷикистон дар шаҳри Конибодом З.Ашӯрматзода ҳусни оғоз бахшида, дар бораи фаъолияти шӯро дар соли сипарии 2023 ҳисобот дод. Зикр гардид, ки Шӯрои ҷамъиятии Ҳаракати ваҳдати миллӣ ва эҳёи Тоҷикистон дар шаҳри Конибодом дар таҳкими сулҳу ободии ҷомеа, тарбияи ҷавонону наврасон дар рӯҳияи ватандӯстиву ахлоқи ҳамида, ҳифзи арзишҳои миллию давлатӣ нақши бориз дошта, дар ин мавзӯъҳои мубрами рӯз ҷаласаву мулоқот ва чорабиниҳои мухталиф доир намудааст.

Дар ҷаласаи ҷамъбастӣ Раиси шӯрои собиқадорони ҷангу меҳнати шаҳр Н.Ғаниев, мудири шӯъбаи кор бо занон ва оила Муҳитдинова, муовини директори коллеҷи омӯзгорӣ Ғ.Баротов, мудири шӯъбаи умумӣ, назорат ва муроҷиати шаҳрвандон У.Ғаниева оид ба фаъолияти шӯро дар самти ҷавонон, собиқадорон, фаъолияти занон ва дигар масъалаҳои иҷтимоӣ баромад карданд.

Дар кори ҷаласа намояндаи Мақомоти иҷроияи ҳокимияти давлатии вилояти Суғд М.Миркамолов иштирок ва суханронӣ намуда, фаъолияти Шӯрои ҷамъиятии Ҳаракати ваҳдати миллӣ ва эҳёи Тоҷикистон дар шаҳри Конибодомро дар соли сипарӣ қаноатбахш арзёбӣ намуд.

Дар анҷом барои хонандагоне, ки дар озмуни "Иншои беҳтарин" ҷойҳои ифтихориро сазовор гардиданд, сипосномаҳо супорида шуд.