Дар асоси розигии Президенти Ҷумҳурии Тоҷикистон бо пешниҳоди Раиси вилояти Суғд ва қарори Раиси шаҳри Конибодом аз санаи 11 январи соли 2024 Охунзода Одил ба вазифаи муовини Раиси шаҳри Конибодом оид ба масъалаҳои рушди иҷтимоӣ ва робита бо ҷомеа таъин гардид.

Зимни муаррифии Охунзода Одил Раиси шаҳри Конибодом Абдусалом Тӯхтасунзода ба роҳбари ҷавон дар ифои содиқонаи кору масъулият барор хост. Шаҳрдор қайд кард, ки ба вазифаҳои пурмасъули роҳбарӣ таъин намудани мутахассисони ҷавон аз дастгириҳои ҳамаҷонибаи ҷавонон аз тарафи Пешвои муаззами миллат муҳтарам Эмомалӣ Раҳмон ва сиёсати ҷавонпарваронаи Роҳбари давлат мебошад.

Охунзода Одил 23-декабри соли 1986 таваллуд шудааст. Хатмкардаи Донишгоҳи давлатии ҳуқуқ, бизнес ва сиёсати Тоҷикистон дар шаҳри Хуҷанд буда, то ин дам дар вазифаҳои сармутахассиси шӯъбаи рушди иқтисод ва савдо, мудири шӯъбаи мазкур ва аз соли 2019 то ин дам дар масъулияти бахши шӯъбаи саноат, нақлиёт ва алоқаи мақомоти иҷроияи ҳокимияти давлатии шаҳри Конибодом фаъолият кардааст.