Инак, аз 1-уми октябр даъвати тирамоҳии ҷавонон ба сафи Қувваҳои мусаллаҳи Ҷумҳурии Тоҷикистон оғоз гардид. Ба ин муносибат дар шаҳри Конибодом аввалин гурӯҳи ҷавонписарон ба сафи Артиш дар вазъияти тантанавӣ гуселонида шуданд. Даъватшавандагони ихтиёрӣ, ҷавонон, донишҷӯёну хонандагони аълохон ва фаъолони шаҳр дар даст парчам ва шиорҳои ифтихорӣ дар ҳудуди шаҳр раҳпаймоӣ намуда, ба майдони Исмоили Сомонӣ ҷамъ омаданд. Рӯзи даъватшаванда бо садо додани суруди миллӣ оғоз гардида, сараввал Раиси шаҳри Конибодом Абдусалом Тӯхтасунзода кулли наваскаронро бо ин рӯзи хотирмон шодбош гуфт ва зикр дошт, ки хизмат ба Ватан масъулияти баландтарину рисолати аввалиндараҷаи ҷавонмард аст. Ва имрӯз давлат ба нерӯйи пурқудрати Артиши миллӣ, садоқату ҷавонмардии муҳофизони шуҷои Ватан эътимод дорад.

Дар тантана комиссари ҳарбии шаҳр Муҳиддинзода Б., Раиси шӯрои собиқадорони ҷангу меҳнати шаҳр Н.Ғаниев ва худи даъватшавандагон ба сухан баромада, ҳифзи марзу буми кишварро таҷрибаи беназири мардонагиву ҷасорат, ифтихору шуҷоат маънидод карданд. Ҷавонписарон низ дар навбати худ ҳамагонро дилпур сохтанд, ки барои тинҷиву ободии ватани азиз ва осудагии ҳамватанони хеш чун пайравони содиқи Пешвои миллат садоқатмандона дар сафи Артиш хизмат мекунанд.

Дар ҷараёни тантана ба фаъолону ҷавонон, кормандони касбу кори гуногун барои саҳми арзандаашон дар таҷлил ва баргузории паради ҳарбӣ ба ифтихори 30 солагии таъсисёбии Қувваҳои мусаллаҳию ва 32 солагии Рӯзи Истиқлоли давлатии Ҷумҳурии Тоҷикистон сипосномаҳои Раиси шаҳр ва тӯҳфаҳои хотирмон супорида шуд.

Раиси шаҳри Конибодом Абдусалом Тӯхтасунзода, Прокурори шаҳр Арбобзода М. ва Раиси суди шаҳр Абдуғаффорӣ А. аз ҷониби Вазорати Мудофиаи Ҷумҳурии Тоҷикистон бо Медали ҷашнии 30 солагии таъсисёбии Қувваҳои мусаллаҳи Ҷумҳурии Тоҷикистон сарфароз гардонида шуданд.

Баъдан маросими анъанавии нонгазон аз тарафи модарони наваскарон гузаронида шуда, даъватшавандагон бо орзуву ниятҳои нек ба хизмати Ватан сафарбар гардиданд.

Дар анҷом барномаи рангини фарҳангӣ ва таронаҳои дилошӯби ватандӯстонаи аҳли ҳунар пешкаш карда шуд.