Дар МТМУ 8 маҳфили хотирмони адабиву фарҳангӣ ба муносибати номгузории дабистони мазкур ба номи шоир, нависанда, адиб ва тарҷумон Алӣ Бобоҷон баргузор гардид. Дар маҳфил қаламкашону эҷодкорон, дӯстдорони шеъру адабиёт, аҳли зиёи шаҳр, ҷавонону хонандагон иштирок доштанд.

Пас аз суханҳои ифтитоҳии Раиси созмони шаҳрии Иттифоқи журналистони Тоҷикистон, сармуҳаррири рӯзномаи шаҳрии "Садои Конибодом" С.Содиқов парда аз рӯйи лавҳа бардошта шуда, дар вазъияти тантанавӣ мактаби мазкур ба номи шоири ширинкалом, шодравон Алӣ Бобоҷон гузошта шуд.

Дар маҳфил муовини Раиси шаҳр Баҳоваддин Баҳоваддинзода, Раиси шӯъбаи вилоятии Иттифоқи нависандагони Тоҷикистон, Шоири халқии Тоҷикистон Аҳмадҷони Раҳматзод, адиби хушқалам Додохони Эгамзод, раиси Шўрои собиқадорони ҷангу меҳнати шаҳр Наимҷон Ғаниев, оҳангсоз ва ҳофизи хушовоз Ҳусейнҷон Юсуфов, сарояндаи хушсадо Дилбар Сулаймонова, ҷияни шодравон Алӣ Бобоҷон – Фароғат Зоҳидова, директори таълимгоҳи рақами 8 Нодира Неъматова хотироти хешро аз ҳаёти ибратангези А. Бобоҷон, эҷодиёти мондагор ва осори адабиаш ёдовар гардиданд. Қайд карда шуд, ки номгузорӣ шудани дабистон ба номи ҳамдиёрамон, шоир Алӣ Бобоҷон нишони эҳтиром ба заҳматҳои содиқонаи шоири барҷастастаи тоҷик ва зинда гардонидани номи ин устоди шеъру калом мебошад.

Сипас, аз ҷониби шӯъбаи вилоятии Иттифоқи нависандагони Тоҷикистон ба китобхонаи мактаб ба маблағи 15 ҳазор сомонӣ адабиёти бадеӣ тақдим гардид.

Дар маҳфил китобҳои назмиву насрии адиб Алӣ Бобоҷон ва мероси пурарзиши эҷодии шоир ба намоиш гузошта шуда, хонандагон аз ашъори мандагори ӯ пораҳо хонданд. Ҳамчунин якчанд таронаҳои рӯҳафзо аз ашъори Алӣ Бобоҷон пешкаши ҳозирин гардонида шуд.