Бо даъвати Ҳукумати ноҳияи Бешариқи Ҷумҳурии Ӯзбекистон 50 нафар кӯдакону наврасони шаҳри Конибодом ба истироҳатгоҳи тобистонаи бачагонаи "Товул" ва 10 нафар собиқадорони шаҳрамон ба осоишгоҳи солимгардонии "Рапқон" -и ноҳияи Бешариқи Ҷумҳурии Ӯзбекистон фиристода шуданд.

Дар маросими гусели истироҳаткунандагон Раиси шаҳри Конибодом Абдусалом Тӯхтасунзода ва Раиси ноҳияи Бешариқ иштирок карданд. Намояндагони ҳарду ҳамсояшаҳр аз дӯстиву бародарии ду миллати ҳамҷавор - тоҷикону ӯзбекон бо меҳру самимият суханронӣ намуда, қайд карданд, ки ин иқдом идомаи робитаҳои ногусастании дӯстиву бародарии байнидавлатии Тоҷикистону Ӯзбекистон мебошад, ки маҳз аз ташаббусҳои инсонпарваронаи Президентҳои давлатҳоямон Эмомалӣ Раҳмон ва Шавкат Мирзиёев сарчашма мегирад ва рӯз аз рӯз таҳкиму густариш меёбад.

Истироҳаткунандагон бо рӯҳияи болида ва қаноатмандӣ аз даврони сулҳу осоиштагии Ватан, дар даст парчамҳои дӯстиву бародарӣ барои фароғату истироҳати тобистона ба ноҳияи Бешариқ сафарбар гардиданд.