Шӯъбаи кор бо зан ва оилаи мақомоти иҷроияи ҳокимияти давлатии шаҳри Конибодом дар якҷоягӣ бо ташкилоти «СММ-занон» санаҳои 11 – 12 апрели соли ҷорӣ дар ҷамоатҳои деҳоти Пӯлодон ва Патар, ки ҷамоатҳои осебпазир дар соли 2015 ба ҳисоб мерафтанд, семинари омӯзишӣ баргузор намуд.

Дар семинар асосан мавзӯъҳои одобу ахлоқи ҳамидаи духтарон, муқаддас будани оила, муносибати нек доштан ва иззату эҳтиром байни зану шавҳар ва аҳли хонаводаи онҳо, ба танзим даровардани ақди никоҳ, мӯҳлат ва зарурияти бақайдгирии ақди никоҳ, «никоҳи динӣ», синну соли никоҳии зану мард, ҳолатҳои кам кардани синни никоҳӣ, мафҳумҳои зӯроварӣ ва хушунат дар оила, ҳуқуқи зану шавҳар, тақсими молу мулки муштарак ва дигар мавзӯъҳои муҳим дар бар гирифта шуд.

Қайд кардан бамаврид аст, ки дар рафти семинари омӯзишӣ бонувони деҳот ба саволҳои худ ҷавобҳои мушаххас ва маслиҳатҳои муфид гирифта, пешниҳод ба миён омад, ки чунин вохӯриҳо ва семинарҳои омӯзишӣ мунтазам ба роҳ монда мешавад.