Ба ифтихори 30 солагии таъсисёбии Қувваҳои мусаллаҳ имрӯз Раиси шаҳри Конибодом Абдусалом Тӯхтасунзода собиқадорони Қувваҳои мусаллаҳро ба ҳузур пазируфта, ҳар яки онҳоро бо ин ҷашни шукӯҳманд шодбош гуфт.

Қайд карда шуд, ки дар ҳифзи осудагии Ватан, таъмини амнияти давлат ва тарбияи ҷавонони содиқу ватандӯст саҳми собиқадорони ҳарбӣ басо бузург аст. Раиси шаҳр ба ҳар яки собиқадорон орзуҳои нек таманно намуда, зикр дошт, ки минбаъд ҳам раҳнамою ҳидоятгар ва тарбиятгари ҷавонон дар рӯҳияи ватанпарастиву ифтихори миллӣ бошанд. Дар ҳар нишасту маҳфилҳо аз дастовардҳои назарраси ватанамон, ҳисси баланди меҳанпарастӣ ва ғамхориҳои пайвастаи давлату Ҳукумат нисбат ба сарбозону афсарон ва хизматчиёни ҳарбӣ бо сокинону ҷавонон сӯҳбатҳо ороянд.

Дар мулоқот ба собиқадорон ҳамчун рамзи эҳтиром нисбат ба садоқату заҳматҳояшон тӯҳфаҳои идонаи Раиси шаҳр тақдим гардид.