Аз тарафи Ташкилоти Барномаи рушди Созмони Милали Муттаҳид синфхонаҳои компютерии чанд муассисаҳои таълимии вилояти Суғд бо барномаҳои муосиртарини интернетию электронӣ муҷаҳҳаз гардонида шуда истодаанд.

Имрӯз дар шаҳри Конибодом низ бо иштироки намояндагони ин ташкилот синфхонаи компютерии литсейи рақами 1 бо ин имконияти электронӣ таъмин гардид. Синфхонаи компютерӣ ба таври замонавӣ таъмир ва бо техникаҳои замонавӣ таъмин гардид. Синфхонаи мактаб пурра аз таъмири хушсифат бароварда шуда, ба мактаб 8-адад компютерҳои нави истеҳсоли охирин, 8-адад мизи компютерӣ, вебкамераҳои назоратӣ, 8-адад курсиҳо ва тахтаи электронӣ тақдим карда шуд.

Дар маросими ифтитоҳи ин синфхона ва фаъолияти интернети босуръат муовини Раиси шаҳр З.Ғафурзода, мудири шӯъбаи маорифи шаҳр Б.Ҷабборӣ ва намояндагони Ташкилоти Барномаи рушди СММ иштирок дошта, ин иқдомро имконияти навбатӣ ба хонандагону илмомӯзон дар самти омӯзиши технологияҳои муосир арзёбӣ намуданд.