Бо ибтикори бахши ҷавонон ва варзиши Мақомоти иҷроияи ҳокимияти давлатии шаҳри Конибодом бахшида ба Рӯзи ҷавонони Тоҷикистон 10-рӯзаи ҷавонӣ эълон карда шуда, дар доираи он чорабиниҳои гуногуни варзишиву фарҳангӣ, баргузории конфронсу ҳамоишҳои гуногун бо иштироки ҷавонон ҷараён дорад.

Аз ҷумла шурӯъ аз 13-май ҳар шом дар ҳудуди ҷамоатҳои деҳот барномаҳои консертӣ таҳти унвони "Шоми ҷавонӣ" доир шуда истодааст, ки дар он консерти ҳунармандони ҷавону боистеъдод пешкаши сокинон ва ҷавонон гардонида мешавад. "Шоми ҷавонӣ" аз ҷамоати деҳоти Пӯлодон оғоз гардида, шоми 13-май дар маҳаллаи Зарбед сурат гирифт. Суруду оҳангҳои аҳли ҳунар ва рақсу сурури бошандагони ҷамоат то дер идома ёфт.

Ҳамчунин шоми 14-май дар ҷамоати деҳоти Фирӯзоба низ барномаи консертии " Шоми ҷавонӣ" бо иштироки васеи сокинон баргузор гардида, баромадҳои рангини ҷавонон, созу сурудҳои дилнишин табъи ҳозиринро болида дошт.

Дар ҳарду маҳфилҳои фарҳангӣ муовини Раиси шаҳр Зарринахон Ғафурзода иштирок ва суханронӣ намуда, ҷавононро аз номи Раиси шаҳр бо фарорасии Рӯзи ҷавонони Тоҷикистон бо орзуҳои неку самимӣ шодбош гуфт. Ҳамчунин мудири шӯъбаи маорифи шаҳр, узви Маҷлиси Миллии Маҷлиси Олии Ҷумҳурии Тоҷикистон Б.Ҷабборӣ, мудири бахши ҷавонон ва варзиши шаҳр Ф.Абдуҷабборов дар суханрониҳояшон ҷавононро қуваи боэътимоди давлату миллат ва фардои дурахшони кишвари соҳибистиқлол унвон карда, онҳоро ҳамчун пайравони содиқи Пешвои миллат ба дӯст доштани Ватан ва саҳмгузорӣ дар ободиву пешрафти кишвари азизамон даъват намуданд.

Барномаҳои консертии "Шоми ҷавонӣ" дар фазои тарабу шодмонӣ ва воқеан ҳам пур аз ҷӯшу хурӯши ҷавонӣ гузаронида шуда, шоми 15-май дар ҷамоати деҳоти Ҳамробоев, 16-май дар ҷамоати деҳоти Патар давом мекунад.

Марҳамат ба "Шоми ҷавонӣ"!