Имрӯзҳо дар саросари мамлакат мавсими даъвати ҷавонписарон ба сафи Қувваҳои Мусаллаҳи кишвар оғоз гардидааст. Бо мақсади бурдани корҳои ташвиқотиву тарғиботӣ дар ҳудуди шаҳр чорабиниҳои гуногун доир гардида истодааст. Аз ҷумла, дар муассисаи таҳсилоти миёнаи умумии № 9 Рӯзи раисони ташкилотҳои ибтидоии собиқадорон доир гардид. Раиси ташкилоти ибтидоии собиқадорони минтақаи зисти Ҳоҷӣ Алиев Набиҷон Орифов дар бораи фаъолияти Шӯрои ташкилот баромад намуд. Муовини раиси шӯрои собиқадорони шаҳр Исмоил Юсуфов оид ба қарорҳои Шӯрои собиқадорони вилоят оид ба омодагӣ ба 71-умин солгарди Ғалаба бар фашизми Германия ва дигар масъалаҳои ба ташкилотҳои ибтидоии собиқадорон вобаста баромад кард.

Сипас, бо иштироки раисони ташкилотҳои ибтидоии собиқадорон дар мактаб дарси шуҷоат бо хонандагони синфҳои болоӣ гузаронида шуд. Дарсро омӯзгор Абдумалик Аброров гузаронд. Дар ин дарс ҷанговари байналмилал Салимов Раҳматҷон, муборизи сохти конститутсионӣ Улмас Ашӯров, иштирокчии бартарафсозии оқибатҳои садамаи НБА Чернобил Розиқ Дадоҷонов ва хонандаи ҳамин мактаб, ки баъди хатми синфи 11 дар сафи Қувваҳои Мусаллаҳи Ҷумҳурии Тоҷикистон хизмат намудааст, Собирҷон Ғаниев иштирок ва баромад карданд. Дар фарҷом раиси Шӯро Қ.Ҳасанов ва собиқадори  маориф  Муйзуллохон Нарзуллоев арзи сипос намуданд.

Баргузории чунин чорабиниҳо барои ҷалби ҷавонписарон ба хизмати ҳарбӣ, баланд бардоштани ҳисси ифтихори ватандориву меҳанпарастӣ ва омода намудани ҷавонон ба дифои Ватан саҳми муассир  мегузорад.