Рӯзи гузашта дар машваратгоҳи беморхонаи марказӣ  мулоқоти Раиси шаҳр Ғайбулло Боҳирӣ бо кормандони соҳаи тандурустӣ баргузор гардид. Зимни мулоқот шаҳрдор фаъолияти кормандони соҳаро мавриди таҳлил қарор дода, аз камбудиву норасоиҳо ва муаммоҳо ҳарф зад. Ҳамчунин, натиҷаи назарсанҷии афкори шаҳрвандон, хунукназарии бархе аз табибон нисбати беморон, сатҳи пасти интизоми меҳнат, дағалмуомилагӣ аз ҷумлаи мавзӯъҳое буданд, ки ошкоро сухан рафт.

Шаҳрдор аз ҷараёни фаъолият дар аксари шӯъбаҳои беморхона  изҳори нигаронӣ намуда, аз бемасъулиятиву риоя нашудани одоби муошират ҳарф зад. Ба менеҷери сохтори бистарикунонӣ  Ш.Ёқубов тавсия дода шуд, ки минбаъд муҳлати фаъолияти мудирони шӯъбаҳо панҷ сол муқаррар карда шуда, истифодаи телефонҳои мобилӣ зимни фаъолият манъ карда шавад.  Сарвари кӯмаки  аввалияи тиббӣ-санитарӣ А.Ёқубов низ бобати пурзӯр намудани назорат вазифадор гардид. Ошкоргӯии шаҳрдор ба хотири пешгирии камбудиҳо ва мувофиқи  талабот ба роҳ мондани хизматрасонии тиббӣ буд, ки аҳли тиб онҳоро бо қаноатмандӣ пазируфтанд.